Адрас:
223311, Мінская вобл.,
г.Беразіно, вул. Кастрычніцкая, 18
Тэлефон:+375 (1715) 5-58-41

 

01.11.2019 15:18

Новаму цэнтру каталіцкай культуры быць!

Новаму цэнтру каталіцкай культуры быць!

 

Год назад “Бярэзінская панарама” пісала пра пачатак будаўніцтва каталіцкага храма. На той час быў закладзены толькі яго падмурак. А сёння, за год плённай працы на новабудоўлі, тут, каля гарадскога стадыёна, ужо яўна паўстаюць сцены касцёла. Па словах ксяндза бярэзінскай парафіі Андрэя Фёдарава, работа не спыніцца да наступлення маразоў: майстры накрыюць дах, а над уваходам узвядуць вежу. Сапраўды, храм патрэбен католікам Бярэзіншчыны, бо дзеючая каплічка па вуліцы Піянерскай, асабліва ў вялікія святы, з цяжкасцю змяшчае ўсіх вернікаў.

 

У мястэчку Беразіно менавіта каталіцкі храм быў першай хрысціянскай святыняй. Яго заснавалі ў 1641 годзе, але драўляны будынак згарэў пры пажары ў 1914. На той час бярэзінская парафія налічвала 8000 вернікаў-католікаў і была найбуйнейшай на Міншчыне. Сёння ж касцёл наведвае прыкладна 100 сямей.

З першых дзён служэння на Бярэзіншчыне ў 2014 годзе ксёндз Андрэй Фёдараў сутыкнуўся са зваротамі прыхаджан аб узвядзенні храма. Неўзабаве справа зрушылася з месца — у 2016 быў зроблены праект, а яшчэ праз два гады пачаліся будаўнічыя работы.

— Нягледзячы на мноства арганізацыйных пытанняў, храм, дзякуючы нешматлікім ахвяраванням, узводзіцца тэрмінова, — распавядае свяшчэннік. — Але яшчэ многае трэба зрабіць, каб ён стаў сапраўдным цэнтрам каталіцкай культуры, дзе можна было б праводзіць імшу, ладзіць сустрэчы з вернікамі, арганізаваць нядзельную школу для дзяцей і весці асветніцкую работу з моладдзю…

Па словах ксяндза Андрэя, усе традыцыйныя хрысціянскія канфесіі імкнуцца да ўмацавання агульначалавечых каштоўнасцей. Напрыклад, сёлета касцёл на Беларусі жыве пад дэвізам “Сям’я — крыніца радасці і надзеі моладзі”. Таму католікі моляцца за лад у сем’ях, святары засяроджваюць увагу на годным выхаванні дзяцей, недапушчальнасці абортаў, скасаванняў шлюбаў, шлюбнай нявернасці, алкагалізму і наркаманіі.

— Людзей трэба накіроўваць да Бога для карысці іх жа саміх, — гаворыць святар. — Таму мне і хочацца захаваць добрыя хрысціянскія традыцыі. І я надта быў рады, калі ў маі гэтага года мы пачалі маліцца пад крыжам каля новабудоўлі храма. Ёсць у Беразіно і добрая традыцыя, калі вернікі запрашаюць да сябе дамоў ксяндза на Каляды. Ды і кожнае свята з літургічнага календара, кшталту Вялікадня і Божага Нараджэння, для ўсіх хрысціян ужо падзея. Дарэчы, сёлета ў бярэзінскім касцёле прайшло адносна многа вянчанняў — а гэта добрая тэндэнцыя. Падрабязней пазнаёміцца з жыццём і дзейнасцю парафіі можна на сайце kataliki-berazino.by. Да таго ж, 16 лістапада ў 12 гадзін адсвяткуем угодкі нашай парафіі: 25 гадоў як гарадскую капліцу пачалі наведваць вернікі. Таму запрашаем усіх нераўнадушных на свята.

Павел САЛАЎЁЎ.

Фота аўтара.

berezinskaya_panorama

15 разоў (а)